Ikaduwang birthday mo na ni na halos dai na kita magkabisto. pasensiya na ta dai ko man ni ginusto. Sa totoo lang hanggang ngonyan makulog pa ang boot ko saimo. Dai ko maintindihan kung tanu pinabayaan mo na maparayo ako saimo maski ginibo ko man ang gabos para dai maghali sa kataid mo, dawa na ngani nawara sako si saro sa mga pinaka-importanteng tao sa buhay ko. Aram ko man na naiintindihan mo ako maski papano, bako man bagang suba-suba ang mga inagihan ko. Gabos na nawara dai ko aram kung maibabalik o mariribayan pa. Siguro dai na talaga…
Dai man baga ko naghagad ning sobra sa kaya mong itao, pero tanu ta halos gabos na lang na nakakapaogma sako bigla na lang nawawara? aram ko man na maraot ako, pero sana tawan mo man ako ning tsansa asin rason para magbago. Pagal na man ako sa ara-aldaw na kababawan kang mundo lalo na sa pagngirit na pirit. Dai ko na aram kung napasain na ang kahulugan kang pagiging sarong barkada ta garo halos gabos ngonyan maisip muna kung ano ang makukua saimo kaysa kung sa ano ang maitatao o maitatabang ninda.
Mawawaran na ning hinangos ang sakuyang kalag sa pagmundo, sa paghanap ning kahulugan sa kawaran. dai ko na aram kung ano o siisay pa ang tutubudon ko, dai ko na aram kung ano ang totoo…
Kaya sana, ngonyan na Pasko, tabangan mo man ako asin ang mga iba pa na makabalik na saimo. Pasensiya ka na ta maski ako dai ko na aram kung pasain na ako o kung siisay talaga ako, pero sana akuon mo man giraray ako bilang barkada mo maski ngani puro sala ang nagigibo ko.
Pakiulay man po, pakihanap saka pakibalik man po si ReX sa kataid mo. gusto niya naman kaya na makanuod ulit magngirit. itong ngirit na dara kang tunay na kaogmahan, kakontentuhan asin katoninongan. kaogmahan, kakontentuhan asin katoninongan na Ika lang ang makakatao…
Happy birthday Manoy!
No comments:
Post a Comment